2 Yóni

Ísu kwíyómpaꞋa irówana Yóni Ísuna kwayó-kwáásí kaumbo-kwááí aíyayaan-iyaꞋiyo. miráumai-ima maisuwéna maanáímbá agaimái tímakaiye. évakarawai sésa aaraiyáváí-áúváí agaimái ámakaiye sewasá évakarawai sésa Ísóigona kwaási mimbóráváꞋá torupamái kwémaeꞋmaeropaꞋa agaimái tímakaiye kwésewe.

2 John

1kemá Ísóigona kwaásiraꞋa kárákwiraundawai éꞋa maanáúváí agaimái timúne. embá kendéí-íꞋa úne séna Áánútu ááyarain-ininkoma ómpo ená iyámpóíyonte awánaaro séꞋa maanáúváí agaimái timúne. Ísóigona árair-aimba ísaraundayaveꞋa sirumbá kwétimune. íma kewé suꞋmainivo Ísóigona árair-aimba ísáawaigwaraꞋa tirumbá kwétimewe. 2kentáávímbá árair-aimba kwaíkwaiꞋa éna íma ánásanintaveta kentáásirumba kwétimune.

3Áánútu kentáásivowe ááninko Ísu Káráísitiye úwoi kwésuwaꞋnaa-esarai tirumbá kwéumasinkesarai paru kwéumasinkaayata póta árair-ainta séta kentáásirumba timúndayaveꞋa ÁánútumpaꞋa námúnaa kwésune.

4évakaꞋa ená iyámpói kentáásivo simásímakaintemba miráumai árair-ampaꞋa kwégon-aimba isáúnana sirunkó kaweꞋá kwéiye. 5aaraigoó embá simámeꞋa séꞋa Ísóigona kwaási moórá-morawaivimba kentirumbá kwétimeꞋa máéro. mináímbá íma aúná-amaamba kwésimatimumpo aivakwárá minkákwárá ívékwaraꞋa ísaraan-aimba kwésimatimune. 6Áánútun-aaiyaamo taagwiyavúndaya mindá Áánútumba sirumbá amúndayaveta kwenáái kwétaagwiyavune. Áánútunkwara kwaásigwaraꞋa tirumbá timéꞋa máéro Áánútu siráimba aivakwárá minkákwárá ívékwaraꞋa kwéisaawe.

7sáwíva-kwaasi kampaꞋá kwésen-kwaasi marapáꞋá kwénaaowe. miwí Ísu Káráísitintavesa sésa íma kwaásiraaniꞋa umái kunkáiye kwésewe. miwí Káráísitina namuro-kwáásí pósa sáwí-ampaꞋa kwígwáe sésa minkámpár-áímbá kwésevo kárákwiyoro. 8Áánútuna mayáímó kwémayaam-beyamba íma máyáavainivo kaweꞋá umái kárákwiyeꞋa amápaꞋ-meyamba kaweꞋ-méyámbá mayánááontaveꞋa kárákwiyoro.

9Ísu Káráísitin-aai íma tátoraamba mináímbá tuwésa óꞋon-ampaꞋa kwégowai íma Áánútuwe tarúmai máyáawe. Ísu Káráísitin-aai tátokaawai kentáásivowe ááninkowe tarúmai máyáawe. 10miráumai kentópaꞋo tésamo mináímbó ímo simátimesamo óꞋon-aimbo simátimiyaꞋo éꞋa íma tiyáámba timéꞋa íma kentí naaúmpaꞋa mósá tínkáaro. 11mirán-kwáásí tiyáámbo timéꞋo éꞋa minkwáásítí sáwí-mayai túwaꞋnaa ónááowe.

12ayáátáár-aimba simátimenaeꞋa maanáúváívímbá íma agayáúmpo kentópaꞋa kwéꞋa kentúrankaꞋa koméꞋa kosimátíménana ketáásirunkoya ávááraumai kaweꞋá íníye. enanaanontávéna kendéí-íꞋa úne séna Áánútu ááyarain-ininkowe kwená iyámpóíyonte keinárawatavesa sésa kaweꞋá umái máéro kwésewe.

kemá Yóni kesáái ánásaiye.

13